অসম আৰু অসমীয়াৰ আবেগ জড়িত হৈ থকা বৃন্দাবনী বস্ত্ৰখনি ব্ৰিটিছ সংগ্ৰাহলয়ত সংৰক্ষিত হৈ আছে। এই পৱিত্ৰ বস্ত্ৰখনি অসমলৈ আনি ৰাইজৰ বাবে প্ৰদৰ্শনৰ সু-ব্যৱস্থা কৰাৰ এক বহুদিনীয়া পৰিকল্পনাৰ অংশ ৰূপে লণ্ডনলৈ যোৱা অসমৰ মুখ্যমন্ত্ৰী হিমন্ত বিশ্ব শৰ্মাই অৱগত কৰা অনুসৰি বৃন্দাবনী বস্ত্ৰখনি ৰাজ্যত প্ৰদৰ্শনৰ সু-ব্যৱস্থা কৰিবলৈ অনাৰ বাবে ব্ৰিটিছ সংগ্ৰাহলয়ৰ সৈতে এক বুজা-বুজিৰ চুক্তিত স্বাক্ষৰ কৰিবলৈ প্ৰস্তুতি চলোৱা হৈছে। শংকৰদেৱৰ কালজয়ী সৃষ্টিৰ নিদৰ্শন বৃন্দাবনী বস্ত্ৰখনি অসমবাসীয়ে চোৱাৰ সৌভাগ্য যাতে অচিৰেই লাভ কৰে তাৰ বাবে সকলো পদক্ষেপ গ্ৰহণ কৰা হ’ব।